ప్రేమంటే ఏమిటంటే.....!!! -2

"ప్రేమ" అనేది మధురానుభూతి. ప్రేమించుకునే వళ్ళకి మాత్రమే ప్రేమలోని తీయదనం అర్థమవుతుంది. నువ్వుంటే చాలు ఈ ప్రపంచమంతా ఏకపోయినా పర్వాలేదనిపించడం ప్రేమ. మన మధ్య దూరం తొలగిపోయి, మనం దగ్గరవ్వాలంటే భూమి కుచించుకు పోవాలి. జనం చస్తారంటావా? చావనీ పర్వాలేదు. మన ప్రేమ ముందు వాళ్ళెంత? పిపీలకాలు! అనుకోవడం ప్రేమ. అది వరకు వందసార్లు విన్న జోకే అయినా ప్రేమించిన వ్యక్తి చెప్తే పగలబడి నవ్వడం ప్రేమ.
"ప్రేమంటే ఒకరి కళ్ళలోకి ఒకళ్ళు చూసుకోవడం కాదు, ఇద్దరూ కలసి ఒకేవైపుకి చూడడం."

చిన్నపిల్లల కబుర్లకీ, ప్రేయసీప్రియుల కబుర్లకీ ఒక సామ్యం వుంది. రెండూ అర్థం పర్థం లేని స్వీట్ నథింగ్సే--ఒక టాపిక్ అంటూ ఉండాల్సిన పనిలేదు. అన్నీ విచిత్రంగా కనిపిస్తూంటాయి, పిట్టలు పైకి ఎలా ఎగురుతాయో దగ్గర నుంచీ కొమ్మలు తలలూపుతూ కదలటం దాకా, తేలిపోయే మబ్బు తునకల నుండి నూరుకాళ్ల గాజుల పురుగుదాకా ప్రతిదీ వింతగా కనిపిస్తాయి. తెలిసీతెలియని మిడిమిడి జ్ఞానంతో వాటిని గురించి గోరంతలు కొండంతలుగా చెప్పుకుంటారు. కావల్సిందల్లా వాళ్లకు ఒకరితో ఒకళ్లు మాట్లాడుకోవడం, మాత్లాడుతున్న విషయం ఏమిటన్నది కాదు.

ఈ లోకంలో చాలామంది "అదృష్టం" అంటే "ఐశ్వర్యం" అని అర్థం చెబుతారు. నా దృష్టిలో "అదృష్టం" అంటే "మనల్ని ప్రేమించే వ్యక్తి జీవితంలో తోడుగా దొరకటం!" ఆ తోడు కొండంత అండగా మనిషికి బలం ఇస్తుంది!. జీవితంలో ఎలాంటి మిట్టపల్లాలు ఎదురైనా, ఆ బలంతో సునాయాసంగా ఎదుర్కోవచ్చు! డబ్బును మనం సంపాదించుకోవచ్చు! కాని "ప్రేమను పంచి ఇచ్చేవ్యక్తి" దొరకటం అనేది కేవలం "అదృష్టం" మీద ఆధారపడి వుంటుంది.