షాదిక్షాంత పద్యములు

షాదిక్షాంత కంద పద్యాలు

షాక్షర మాదిగఁ జెప్పెద
నీ క్షణమునఁ గందపద్యనివహము వరుసన్
వీక్షింపర దయతో నిటు
రాక్షసహర! రామ! మోక్షరామాధ్యక్షా!

షడ్రాజన్యాంబరయుత
రాడ్రతవర్గస్తుతామరస్సరసీజా
తేడ్రుడ్యాగారపరి
వ్రాడ్రీవర! రామ! మోక్షరామాధ్యక్షా!

షణ్మిధునాంభస్సంభవ
రాణ్మానిత నూత్నరత్న రాజన్మకుటో
ద్యన్మండితాంతరీక్ష! వి
రాణ్మూర్తీ! రామ! మోక్షరామాధ్యక్షా!

షట్పదలసితోద్యస్మిన్
త్రిట్పదలాంగప్రకాశధీరాజిత! గ్రా
జట్పదజటిపటనానా
రాట్పూజిత! రామ! మోక్షరామాధ్యక్షా! 

వెంకటగిరి రాజు వెంకన్న కవి పాండిత్యాన్నీ, ఆశుధారాపాటవాన్నీ, సమయస్ఫూర్తినీ, చాతుర్యాన్నీ మెచ్చుకొని నూటపదార్లు బహుమానమిచ్చి, పట్టుబట్టలు పెట్టి సత్కరించాడట!

(శ్రీ దీపాల పిచ్చయ్య శాస్త్రి గారి "చాటుపద్య రత్నాకరము" నుండి)

షండులె నీముందందరు

గండర గండ ! పురుష ! మరి గతి నీవేగా ! 

పండుగ మాకగు నాడే

నిండుగ నీ కరుణ దడువ, నిగమాధ్యక్షా !!

                                                                                                                                 - గోలి హనుమచ్ఛాస్త్రి గారు

షణ్మత సంస్థాపకుడవు !

మృణ్మయమగు మూఢజనుల మేధస్సుకు సం 

విన్మహిమ గూర్చు నో యతి

రాణ్మణి ! నిను గొల్తు శంకరా ! మృదు వీక్షా !!!

షట్కాలంబులలోన వ

షట్కారుడవైన నిన్ను స్మరియింతు ; ద్విషత్ 

షట్కము నదలింపగ , నా

షట్కర్మములందు గొలుతు , జయ ! నిటలాక్షా !!! 

                                                                                                                                  -డా. విష్ణు నందన్ గారు