నిను నిను నిన్నునిన్ను

మోచెర్ల వెంకన్న కవి సమస్యా పూరణలు

సమస్య - "నిను నిను నిన్నునిన్ను మఱి 

నిన్నును నిన్నును నిన్ను నిన్నునున్"

(అ) రామాయణార్థంలో ....
చం. 
అనిలజ! జాంబవంత! కమలాప్త తనూభవ! వాయుపుత్ర! యో
పనస! సుషేణ! నీల! నల! భానుకులుం డగు రాఘవేంద్రుఁ డ
ద్దనుజపురంబు వే గెలువ దైత్యులఁ జంపఁగ వేగ రమ్మనెన్
నిను నిను నిన్నునిన్ను మఱి నిన్నును నిన్నును నిన్ను నిన్నునున్.

(ఆ) భారతార్థంలో ...
చం.
అనఘ సురాపగాతనయ! యర్కతనూజ! విచిత్రవీర్యనం
దన! గురుపుత్ర! ద్రోణ! కృప! నాగపురీశ్వర! దుస్ససేన! ర
మ్మనుమనె రాజసూయము యమాత్మజు డిప్పుడు చేయఁబూని తా
నిను నిను నిన్నునిన్ను మఱి నిన్నును నిన్నును నిన్ను నిన్నునున్.

(ఇ) భాగవతార్థంలో ...
చం. 
అనఘ సురేశ! వాయుసఖ! ఆర్యమనందన! రాక్షసేంద్ర! యో
వననిధినాథ! గంధవహ! వైశ్రవణా! నిటలాక్ష! తాను ర
మ్మనుమని చెప్పె మాధవుఁడు మారుని పెండ్లికి మిమ్ము నందఱిన్
నిను నిను నిన్నునిన్ను మఱి నిన్నును నిన్నును నిన్ను నిన్నునున్.

(శ్రీ దీపాల పిచ్చయ్య శాస్త్రి గారి "చాటుపద్య రత్నాకరము" నుండి)

ఘనతర మీనమై ధరనుఁ గాచు వరాహము, మేటి కూర్మమై, 

కనగ నృసింహమై, వటువుగాన్ మఱి రాముడు, కృష్ణ, కల్కి గా

మనమున మాయెడన్ కరుణమాయకయుండెడి దేవ! గొల్తు నేఁ

నిను,నిను,నిన్ను,నిన్ను మఱి నిన్నును,నిన్నును,నిన్ను,నిన్నునున్

ఇనకుల చంద్రు డిట్లు తన యింతిని కానల పాలు జేసెగా !
మనమున మ్రొక్కుచుంటి నిట మాతను జక్కగ రక్ష జేయగా !
ఎనిమిది దిక్కులన్ జగతి నేలుచు నుండెడి నేతలార! నే 
నిను నిను నిన్నునిన్ను మఱి నిన్నును నిన్నును నిన్ను నిన్నునున్!!

వినుమయ పెద్దనా ! సుకవి పింగళి సూరన ! రామకృష్ణ ! తి
మ్మన కవి ! భట్టు మూర్తి ! మరి మల్లన ! ధూర్జటి ! రామభద్ర ! రా
యని సభ వేళ యయ్యెను ; రయమ్మున బిల్వగ వచ్చి నిల్చితిన్ 
నిను నిను నిన్నునిన్ను మఱి నిన్నును నిన్నును నిన్ను నిన్నునున్ !!!